1. هذا الموقع يستخدم الكوكيز. مواصلة تصفح الموقع تعني أنك توافق على هذا الاستخدام. اقرأ أكثر.

سَرْ الوْصِيَة ،،

الموضوع في 'الشعر الزاجل' بواسطة حكيم البورشدي, بتاريخ ‏2/8/17.

  1. سَرْ الوْصِيَة ،،

    كُلْ لِيلَة كَانَتْ حُلْمْ
    ؤُ كُلْ حُلْمْ
    كَانْ كِيفْ العَادَة
    فِيهْ الخِيرْ
    ؤُ فِيهْ الظُلْمْ وَحْدُو
    كَانْ سَامِي ؤُ فُوقْ العَادَة
    حَرْتْ بِينْ الكْلَامْ وَ التَسْوَالْ
    ؤُ شْحَالْ مَنْ جْوَابْ
    كَانْ فِالحْلَامْ ضْبَابَة

    وَ مَلِّي فَقْتْ
    عْرَفْتْ الضْبَابَة
    غِيرْ سُؤَالْ
    غِيرْ غُولْ سَارَحْ فْ غَابَة
    ؤُ مَلِّي تْبَعْتْ الرَّيْ بِالتْمَامْ
    ؤُ فَسَّرْتْ بِيهْ الاحْلَامْ
    عْرَفْتْ عْلَاشْ جَدَّة
    كَانَتْ تْلَيَّڭَْ بِالڭََطْرَانْ
    عْلَاشْ كَانَتْ رِيحْتُو
    عْلَى رِيحْةْ الكَافُورْ
    طَاغْيَة عَالمْكَانْ

    يَمْكَنْ كَانْت الحَكْمَة
    فْعُرْفْ جَدَّة
    تْوَلَّفْنَا مْرُورَة لِيَّامْ
    ؤُ تَفْطَمْنَا عَالاحْزَانْ
    يَمْكَنْ عْرَفْتْ عْلَاشْ جَدَّة
    مَا شَدَّتْ دَيَّة
    فْمُوتْ جَدِّي احْجَرْ
    وَلَّا احْنَاتْ فْيُومْ الظْهَرْ
    وَلَّا رَكْبَتْ عَالعْطِيَة
    ؤُ حَلَّتْ صَرَّةْ الوْصِيَّة
    ؤُ ڭََالَتْ مَنْ الزْهَرْ
    مَلِّي جَدَّكْ مَاتْ اغْدَرْ

    يَمْكَنْ جَدَّة
    لْڭََاتْ الوَرْثْ اصْبَرْ
    وَلَّا يَمْكَنْ جَدِّي مَاتْ
    وَ تَدْفَنْ سَرُّو فِالقْبَرْ
    يَمْكَنْ عْرَفْتْ
    عْلَاشْ جَدَّة دَارَتْ اوْشَامْ
    حَطَّتْ كَفْ الحَنَّة عَالحْجَرْ
    ؤُ دَارْتُو شَاهَدْ لِ القْبَرْ
    ؤُ ڭََالَتْ هْنَا اتْزَادْ جَدَّكْ
    هْنَا مَاتْ ڭََدَّكْ
    هْنَا دْفَنْتُو عْلَى وَدَّكْ

    إِلَى عَڭْبَتْ الكَرْمَة
    تَبْنِي عْرُوشْهَا عَالظَّلْ
    ؤُ عَادْ ثْمَرْهَا زَاهَرْ يْطُلْ
    غَدَّا تْجِيبَكْ رِيحْةْ المَا
    اگْبَلْ مَا يْدِيعْ فِالڭََاعْ
    اڭَْبَلْ مَا البِيرْ يَتْبَاعْ
    وَ يْحَوْزُو حْجَارُو
    وَ يَتْخَلَّطْ طِينُو بِالدْبَاغْ

    هَا عَاهَدْ حَنَّاكْ
    ؤُ عَارْ الحْلِيبْ اللِّي رَضَّعْنَاكْ
    عَارْ البَزُّولَة المَعْزُولَة
    فْذِيكْ الكُدْيَة
    ؤُ فْذَاكْ الجْبَلْ
    اللِّي عَابْ
    ؤُ مَا بْقَى يَعْجَبْ
    عَارْ المْرَا المَغْلُوبَة
    ؤُ عَارْ الوْلِيَّة المَعْلُولَة
    عَارْ لَالَّة وْ لَالَّاكْ
    ؤُ الڭََمَّاطْ اللِّي رَبَّاكْ
    عَارْ الكَتْبَة المَڭَْلُوبَة
    وَ خْطُوطْ الشُّومْ الذَّابْلَة
    فْكَفْ حَدُّومْ
    مَا خَلَّاتْ حَنَّتْهَا ادُّومْ
    وَلَّا تْبَرِّيهْ مَنْ الحْمُومْ

    إِلَى مَا هَزِّي جْلَايْلْ الحُڭَْرَة
    ؤُ كَبْرِي فِيكْ الخَاطَرْ
    سَمْعِي الخَطْوَة صُوتْ الخْلَاخَلْ
    ؤُ فُكِّي عُڭَْدَة احْزَامَكْ تَمَّا
    ؤُ خَلِّي لِاوْلَادَكْ عَشْبَة
    مَنْ ذِيكْ الحَزْمَة
    ؤُ كَتْبِي وْصِيْتَكْ فِالمَا
    إِلَى تَهْتْ تْرُدْنِي الكَرْمَة
    وَ يْلَا عْطَشْتْ
    مَا تْڭََدْنِي فِيكْ جُغْمَة
    وَ يْلَا اكْتَابْ المَكْتَابْ
    ؤُ طَحْتْ مَنْ البَالْ
    نْزَاوْڭَْ فِالڭََمْرَة إلَى بْغَاتْ
    مَا تْرُدْنِي لَكْ عَاڭََرْ
    مَا نْجِيكْ غَدَّا مَعْلَالْ ،،

    سَرْ الوْصِيَّة
    الزجال حكيم البورشدي
     
    أعجب بهذه المشاركة محمد اليعقابي
  2. عائشة رشدي أويس

    عائشة رشدي أويس شاعرة الغربة والحنين

    قصيدة في منتهى الروعة والجمال
    أحسنت وأبدعت ياأستاذ حكيم
     
    أعجب بهذه المشاركة حكيم البورشدي
  3. تتويج لحرفي و كلمات رائعة أثلجت صدري من شاعرة متألقة و مبدعة راقية أبت إلا أن تترك بصمتها بجمال حرفها البهي بين سطور زجلية سَرْ الوْصِيَة
    بوركت سيدتي و دام لك المجد
     
  4. كفاح جرار

    كفاح جرار الباحث

    جميلة لهجتك
     
    أعجب بهذه المشاركة حكيم البورشدي
  5. الأجمل مرورك الكريم و كلمتك الراقية التي أضاءت حرفي هنا ،،
    مودتي و تقديري أخي كفاح جرار
     

مشاركة هذه الصفحة