1. هذا الموقع يستخدم الكوكيز. مواصلة تصفح الموقع تعني أنك توافق على هذا الاستخدام. اقرأ أكثر.

مَاشِي عَيْبْ ،،

الموضوع في 'الشعر الزاجل' بواسطة حكيم البورشدي, بتاريخ ‏14/8/16.


  1. إِلَى رَادْ اللَّهْ مَا رَادْ
    انْشُوفْ الڭَمْرَة امْدَادْ
    اضَّوِي اللْوَاحْ
    اتْبَرِّي الحْرُوفْ
    اتْعافِي الجْرَاحْ
    مَاشِي عَيْبْ ،،
    انْدِيرْ الوَرْقَة امْصَلَّى
    وَ انْصَلِّيوْ اجْمَاعَة
    مَا نْجِيوْهَا فُرْقَة
    وَ نْفَرْقُو القَبْلَة عْلَى رْبَاعَة
    وَ نْرَدُّو الدْوَايَة رَضَّاعَة
    شِي يْمُصْ العَيْبْ
    وْ شِي يْشَرْبَكْ الڭَطْرَانْ
    حْلِيبْ
    وْ شِي يَقْرَا النَّيَّة
    فِكْتَابْ الغَيْبْ
    إِلَى رَادْ الله مَا رَادْ
    عْلَى غَفْلَة
    نَقْضِيوْ الغْرَاضْ
    انَّڭِّيوْ الحْجَرْ
    مَنْ طْرِيقْ الوَادْ
    وَ نْخَلِّيوْ المَا يَجْرِي هَوَّادْ
    اتْلَمْ الضَّمَّة عَالشَّدَّة
    وْ مَا نْدِيرُو مَنْ الشُّوكْ
    هَمْزَة تْهَزْنَا عَالعْوادْ
    إِلَى رَادْ اللَّهْ
    مَاشِي عَيْبْ
    نْكَتْبُو القْصِيدَة عِيدْ
    أُو نَحْيِيوْ الرَّحِمْ مَنْ جْدِيدْ
    نْلَبْسُو الحَرْفْ جَلَّابَة
    وْ طْرِبِيشْ جْدِيدْ
    نْدِيرُوهْ
    فِخْنِيشَاتْ الفَانِيدْ
    وَ نْفَرْقُوهْ
    بِحْلَاوْةْ الزْبِيبْ
    حَبَّة مَنُّو تْفَاجِي الگْلِيبْ
    العَيْبْ انَّشْرُوهْ اعْرَى
    نْشِيرْ الڭَدِّيدْ
    إِلَى مَا شَرْقَتْ تْفُوحْ
    رِيحْتُو
    غِيرْ غُدَّة وَ غْدِيدْ
    مَصَّابْ
    نْجَمْعُو دْرَاهَمْ العِيدْ
    نْزِيدُوهُمْ عْلَى فْلُوسْ القْلَمْ
    أُو نَشْرِيوْ مَصَّاصَّة
    وْ كَابُوسْ وَ حْبَلْ جْدِيدْ
    مَاشِي عَيْبْ
    نْلَعْبُو فْعَيْشُورْ غِيرْ بِالْمَا
    بْلَا مَا نْشَعْلُو العْوَافِي
    وَ نَتْرَاشُّو بِِجْمَرْ القْوَافِي
    نْكَبْرُو الڭَاعَة
    أُو مَا نْلَعْبُو النَّڭْ
    انْرُدُّو الحَرْفْ نَبْلَة
    أُو عْلَى غَفْلَة فِينَا يَرْشَڭْ
    مَاشِي عَيْبْ
    اللِّي طَيَّحْ الحْبَلْ
    يَدْخُلْ الڭَاعَة وَ يْعَاوَدْ يْشَدْ
    إِلَى مَا عْفَا اللَّهْ
    وْ دَارْ النَّيَّة دْرَاعُو يَتْهَدْ
    مَصَّابْ
    نْعَرْفُو قِيمْةْ التْرَابْ
    أُو مَا نْعَفْطُو عْلِيهْ
    مَصَّابْ مَا يْتَّرْفَدْ فِالنْعَالَة
    وْ مَا يَتَّمْ
    مَا نْقَطْعُو عَرْڭْ
    مَا نْسَيْحُو دَمْ
    مَا نْرَدْمُو بْيَارْ
    مَا نَمْنْعُو الخِيرْ يْعُمْ
    يَاكْ العَينْ ڭَدْ مَا جْرَاتْ
    دَايْزَة وَ تْكُبْ
    مَاشِي عَيْبْ
    نْصَلِّيوْ اجْمِيعْ بْلَا شْتَا
    إِلَى قَلِّينَا المَا فِالوْضُو
    خِيرْهَا عْلِينَا يْصُبْ
    إَلَى عَطْفَتْ مَا نْتَبْعُو رْهُوطْ
    مَا نْلَبْسُو عْلِيهَا بُوطْ
    نْزَرْعُوهَا مْحَبَّة
    تَقْرَانَا فِالكْفُوفْ خْطُوطْ
    مَصَّابْ
    نْعَرْفُو قِيمْةْ التْرَابْ
    وَ نَبْنِيوْ قَلْبْ جْدِيدْ
    مَاشِي عَيْبْ
    نْدَوْرُوهْ بِشْوَيَّةْ الحْدِيدْ
    مَا يْصَدِّي
    مَا يَزْعَلْ
    مَا يْنِينْ
    مَا يْگُولْ أَنَا مْرِيضْ
    مَاشِي عَيْبْ
    نَتْعَلْمُو البْنِي
    ڭْبَلْ مَا نَبْنِيوْ القْصِيدَة
    نَبْنِيوْ عْرُوقْ غْلِيضَة
    مَا تْخَلِّي المْدَادْ امْكَبَّدْ
    وَلَّا حْبَلْ الوَدْ بِينَّا يَتْجَبّد
    مَاشِي عَيْبْ
    يْدِيرُو لِلقْلَمْ فْرَانْ
    وَ نْهَزْ بِيدِي الڭُومَة
    وَ نْتَبَّعْ الحْرُوفْ المَسْمُومَة
    مَا نْسَمِّي هَذَا غْرَابْ
    وَلَّا ذِيكْ بُومَة
    وَلَّا نْخَلِّي الفُمْ ازْفَرْ
    يَاكْلُو بِيهْ الثُّومَة
    مَاشِي عَيْبْ
    نْفَطْرُو بِالحَرْفْ عَالرِّيقْ
    وَ نَتْقَاسْمُو
    عْلِيهْ الطْرِيقْ
    وَ نْكَاحْزُوهْ بشوية
    مَنْ الضِّيقْ
    مَاشِي عَيْبْ
    إِلَى شَتُّو سَالَفْ غَنُّو
    و بْغِيتْ ظْفِيرَة مَنُّو
    العَيْبْ إَلَى بُو غَنُّو
    مَا جَابَشْ احْسَنْ مَنُّو
    مَاشِي عَيْبْ
    نَلْبَسْ حَرْفْ جَدِيدْ
    أُو مَاشِي فَرْضْ
    يَطَّرَّزْ بِالوْڭِْيدْ
    العَيْبْ نْكَتْبُو بِالكَبْرِيتْ
    وَ نْدِيرْ لِيهْ رَاسْ مَنْ لُوقِيدْ
    إِلَى تْحَكْ نْحَرْڭُو يَدِّينَا
    أُو مَا نْعَرْفُو الظَّالَمْ فِينَا
    مَاشِي عَيْبْ
    إِلَى قَلَّبْنَا فِينْ العَيْبْ
    العَيْبْ إِلَى عْرَفْنَاهْ فِينَا
    وْ مَا ڭَرْ عْلِينَا
    العَيْبْ
    إِلَى بْقِينَا غَادْيِينْ
    فِالمْصَايْبْ
    مَاشِي عَيْبْ
    إِلَى كَانْ الشُّوفْ مْظَلَّمْ
    العَيْبْ
    إِلَى هَزِّينَا الظَّلْمَة فِالقْلَمْ
    وْ إِلَى رَادْ اللَّهْ مَا رَادْ
    نَقْرَاوْهَا مَاشِي عَيْبْ
    رَاهْ الفَرْقْ
    كْبِيرْ بِينْ مَاشِي وْ مَاشِي
    بْلَا مَا نْرَكْبُو الحَرْفْ الرَّاشِي
    أُو إِلَى رَادْ الله مَا رَادْ
    بِينْمَا يْكَبْرُو الوْلَادْ
    نَتَّقَاوْ اللَّهْ
    أُو نَحْضِيوْ المْدَادْ ،،

    زَجلية : مَاشِي عَيْبْ
    بقلم الرجال حكيم البورشدي

     

مشاركة هذه الصفحة