1. هذا الموقع يستخدم الكوكيز. مواصلة تصفح الموقع تعني أنك توافق على هذا الاستخدام. اقرأ أكثر.

الكَنس اللارب

الموضوع في 'الشعر الزاجل' بواسطة عبد العزيز سرحاني, بتاريخ ‏12/8/16.

  1. الكَنس اللَّارب


    كَنس اللارب

    تزيدُه الربع اللي ناقص

    يطلب النص

    ويفوت النص

    حتى يميل الميزان

    على كفوفُه

    وتعواج شوكتُه

    ويجي على الدص



    كنس اللارب

    كيموت ف الطرقان

    مرة زربان

    مرة زعفان

    حسبها لَعْبْ

    كيميزي روحه

    ويروح ب شلا رْواح

    كصيدة تبعَ كصيدة

    وحلفات القصيدة

    حتى تروي بدمُه

    شلا مسالك ومسارب


    كنس اللارب

    كيموت عل لبحر

    كيموت ف البحر

    وْجَهْ المحاين

    ما راضي ب حالُه

    ما تعلم يصبر

    ما قادر يساين

    طامع ف الغربة

    ف الزعرة والأورو

    ومن جهلهُ وارد

    حسبها جنة

    وهي جهنم

    تحت الما البارد

    "كرش الحوت

    ولا تراب البلاد"

    حيت متلف الوتاد

    ومعني ب العناد

    كرانهُ قانعين

    وهو زارب


    كنس اللارب

    كيموت ف الكورة

    كيموت عل لكورة

    اللي كتدور عليه

    حتى شركات شبكيه

    وربات عين كبوت

    ف شباكي الغير

    وما نفع معها

    بخور ولا بهوت

    لا "إيلطرا" لا "تيفو"

    اتفو...

    ولا الزهر لاعب

    حتى خسرات الصورة

    و سال بهاها من العين

    حتى للشارب


    كنس اللارب

    كيموت مجلي

    ف بلادات الغرب

    ف بلادات العرب

    باغي يهرب ما يولي

    باغي يدي ما يعطي

    حتى كيزكل الحساب

    ويبقى مهدود

    بين الشوك والحدود

    بين البرد والدل

    ما عارف ما يقدم

    ما عندُه ما يتلي

    وما صاب ف تلفتُه

    ما يقارب


    كنس اللارب

    كيموت مشتت

    مفركع مزلع

    حزموه ب الخرايف

    حتى نسى المْحَنَّة

    فرشوا ليه

    قشور البنان

    حتى وصلوه للجنة

    شربوه التبحليس

    حتى بقى ف ابليس

    ومات بلا شراب سكران

    غيرُه كيتدفن كامل

    وهو بالعرام

    حرام

    حرام

    يا الكنس السايب


    كنس اللارب

    كيموت ب لَمْضى

    ب الموس ب السيف والكطرزا

    مسلح ب الليل

    مسلح ب النهار

    تكول خدام ف الكرنا

    ولا كزار سكناه الحرفا

    كيتسنى السبة

    باش يدبح

    باش يكزر

    باش يتك ب ليشْفا

    ويهرب وينسى

    حيث خواف

    حيت غدار

    على طول ليام

    كيتخبى مور قباحته

    ما يحشم

    مايندم

    ما يرجع للقدام

    مرة كامي

    مرة شام

    وهلالُه غارب


    كنس اللارب

    كيموت عل لحرب

    كيموت ف لحرب

    كيقعدوه وينصروه ويدعشوه

    كيزيدوه ك لهدية

    حيت عرفوه نية

    كيبايعوه أمير

    وهو ب حياتًه

    ما عارف ما يدير

    وسلامته قليلة

    بين الأحباب

    ما يقيلوه حتى يسبق

    دمه للتراب

    ما مات على بلادُه

    ولا على ولادُه

    مات على سيادُه

    اللي كيبيعوا امراتُه

    ف سوق النخاسة

    وكيواعدوه ب مْيَة

    إلى وصل لهيه

    سوا مات مضروب

    ولا ضارب


    كنس اللارب

    يا كنسي

    أنا منك وبيك معني

    خد طرف من روحي

    وزيد الربع اللي خصك

    واكمل

    وتْكَمًلْ

    و وقف على راسك

    قبل من رجليك

    واعطي الضهر للحدود

    واغرس كبدتك ف ترابك

    حيت تراب لبلاد عسل

    وخا يعمر ب لعكارب

    خد طرف من روحي

    وديرُه شوكة

    ف حلق الغدر

    خد طرف من روحي

    وديرُه جلالة

    ف عين الشر

    وديك اللارب

    تولي واحد ونص

    ونكتبوا قصيدة جديدة

    أنت عليك ب الصبر

    وأنا عْلِيَ ب القوافي

    حتى نخلي كل حرف

    من غدايدي شارب.

    مارس 16
     
  2. محمد اليعقابي

    محمد اليعقابي مشرف قسم المقالة طاقم الإدارة

    لم أفهم معنى "كنس الارب"
     
  3. الكَنس : الجنس بالدارجة المغربية
    اللارب : الناقص
     
  4. محمد اليعقابي

    محمد اليعقابي مشرف قسم المقالة طاقم الإدارة

    شكرا لك على الجواب. فهمت أن الكنس هو الجنس، أما اللارب فلم أسمع بها من قبل. وإن كنت قربتها من اللاربع. على كل حال فهمت المقصود من هذا النص الجميل. مع تحياتي
     
  5. شكرا على اهتمامك استاذي السي اليعقوبي
     

مشاركة هذه الصفحة